Aktori shumë i dashur për publikun shqiptar dhe turk, Çağatay Ulusoy, ka lënë të gjithë pa fjalë me surprizën e tij më të fundit. I njohur për natyrën e tij diskrete kur vjen puna te jeta sentimentale, këtë herë aktori ka bërë një përjashtim për dashurinë.

Mbrëmjen e kaluar, Çağatay ishte protagonisti kryesor në festën e ditëlindjes së të dashurës së tij, aktores Aslıhan Malbora. Pamjet nga kjo festë private po qarkullojnë me shpejtësi në rrjetet sociale, ku shihet se çifti ka zgjedhur të festojë nën shoqërinë e miqve më të ngushtë në një ambient të ngrohtë me muzikë live.

Kulmi i mbrëmjes ishte momenti kur Çağatay doli vetë në skenë, mori kitarën dhe performoi për Aslıhan, duke treguar jo vetëm talentin e tij muzikor, por edhe anën romantike. Aktorja dukej e buzëqeshur dhe e lumtur, duke shijuar dedikimin e veçantë të partnerit të saj.

Festa u bë edhe më e veçantë me pjesëmarrjen e miqve VIP, ku këngëtari Mert Koç iu bashkua Çağatay-t në skenë, duke kthyer ditëlindjen në një mini-koncert fantastik me këngë dhe kërcim.

Kujtojmë se shkëndijat e para mes Çağatay Ulusoy dhe Aslıhan Malbora nisën gjatë xhirimeve të serialit hit “Kübra”, dhe që atëherë çifti ka ruajtur jetën private larg paparacëve. Ky moment i fundit tregon se marrëdhënia e tyre është më e fortë dhe më e lumtur se kurrë.