Këngëtarja e njohur Filloreta Raçi ka reaguar publikisht në rrjetet sociale lidhur me bashkëpunimin e saj me kompaninë muzikore Onima, mes zhvillimeve të fundit që kanë përfshirë këtë label.

Në një postim të gjatë, Fifi ka bërë të ditur se është pjesë e kësaj kompanie që nga viti 2019 dhe se deri më tani ka pasur një eksperiencë pozitive me pronarin Erkand Shabani. Ajo theksoi se marrëdhënia e saj profesionale ka qenë korrekte dhe pa probleme.

Ky reagim vjen në një moment kur emri i kompanisë është përfshirë në një çështje të ndjeshme, pasi Gjesti ndodhet aktualisht në paraburgim, nën dyshimet për kërcënim ndaj pronarit të “Onima”.

Fifi u shpreh se përvojat me individë të ndryshëm janë subjektive, duke nënvizuar se pakënaqësitë apo kënaqësitë varen nga raportet personale që secili ka. Ajo shtoi gjithashtu se para nënshkrimit të kontratës, ka konsultuar një avokat dhe është e qartë për të gjitha kushtet dhe detyrimet ligjore.

Në fund të reagimit të saj, artistja la të kuptohet se qëndrimi i saj mbetet i palëkundur, duke u shprehur se kushdo që nuk pajtohet me mendimin e saj është i lirë të largohet nga ndjekësit e saj në rrjetet sociale.

Deklarata e Fifit ka nxitur reagime të shumta online, duke rikthyer vëmendjen mbi raportet mes artistëve dhe shtëpive diskografike në tregun muzikor shqiptar.