Një moment sa prekës aq edhe ironik është vënë re së fundmi nga ndjekësit e Big Brother VIP Albania. Teksa banorët janë të izoluar plotësisht nga bota e jashtme, Gimbo ka shprehur hapur mallin për mikun e tij Besart Kelmendi, i njohur për publikun si Gjesti.

Gjatë një bisede brenda shtëpisë, Gimbo tha se Gjesti i mungon shumë dhe se do të dëshironte që një ditë ai t’i bënte një surprizë duke hyrë në shtëpi. Pa e ditur situatën që po zhvillohej jashtë, ai foli me nostalgji për mikun e tij, duke bërë që shumë ndjekës ta shohin këtë moment si tepër emocional.

Por ajo që e bëri këtë situatë edhe më të komentuar është fakti se pikërisht në të njëjtën ditë kur Gimbo e përmendte brenda shtëpisë, jashtë saj Gjykata kishte vendosur t’i caktojë Gjestit masën e paraburgimit prej 30 ditësh.

Ky kontrast i fortë mes Gimbos që e pret mikun e tij brenda shtëpisë dhe realitetit që po përballet Gjesti jashtë, ka bërë që rrjetet sociale të mbushen me reagime. Shumë ndjekës kanë komentuar se situata është e pazakontë dhe se Gimbos duhet t’i tregohet e vërteta, duke qenë se bëhet fjalë për një person shumë të rëndësishëm në jetën e tij.

Megjithatë, mbetet për t’u parë nëse produksioni i Big Brother VIP Albania do të vendosë të thyejë rregullat e izolimit për t’i dhënë këtë informacion banorit, apo nëse ai do të vazhdojë rrugëtimin e tij në shtëpi pa e ditur se çfarë po ndodh jashtë me mikun e tij.