Kryeministri i Kosovë, Albin Kurti, ka deklaruar se Republika nuk do të bëjë asnjë kompromis kur është në pyetje sovraniteti shtetëror, integriteti territorial dhe demokracia.

Në fjalimin e tij në seancën solemne për 18-vjetorin e shtetësisë, Kurti theksoi se këto parime janë fryt i përpjekjeve shekullore të aktivistëve dhe luftëtarëve që kontribuuan në ndërtimin e Republikës.

Ai u ndal edhe te procesi gjyqësor në Hagë ndaj ish-udhëheqësve të Ushtria Çlirimtare e Kosovës (UÇK), të cilët po përballen me akuza për krime lufte, duke i cilësuar akuzat si të padrejta.

“Ndërsa shënojmë përvjetorin e shpalljes së Republikës, nuk mund të mos shprehim shqetësimin për faktin se krerët e UÇK-së dhe të Republikës po akuzohen padrejtësisht, sepse morën armët për liri kundër një shtypjeje njëshekullore dhe një regjimi gjenocidal. Akuzat e Prokurorisë në Hagë nuk marrin parasysh kontekstin historik e politik të luftës sonë çlirimtare”, tha Kurti.

Ai shtoi se krimet kundër njerëzimit, sipas tij, janë kryer nga Serbia e udhëhequr nga Slobodan Milošević, ndërsa paralajmëroi për rrezikun që, sipas tij, paraqet Serbia e sotme nën drejtimin e Aleksandar Vučić.

Kurti theksoi se çdo përpjekje për të barazuar drejtuesit e UÇK-së me një regjim gjenocidal është e papranueshme për institucionet e Kosovës, duke përsëritur se Republika nuk lëshon pe në mbrojtje të sovranitetit dhe rendit demokratik.