Një rast i rëndë ka tronditur opinionin publik në Kosovë, pasi një fëmijë 5-vjeçar dyshohet se është keqtrajtuar dhe për këtë arsye është dërguar për trajtim në Qendra Klinike Universitare e Kosovës.

Pas këtij rasti, Ministria për Punë, Familje dhe Vlerat e Luftës Çlirimtare ka reaguar menjëherë, duke marrë masa urgjente për mbrojtjen e fëmijëve të tjerë në familje. Sipas njoftimit zyrtar, edhe gjashtë fëmijë të tjerë janë larguar nga familja dhe janë vendosur në strehim të sigurt.

Institucionet përgjegjëse kanë vepruar në koordinim të plotë, ku Qendra për Punë Sociale në Lipjan, në bashkëpunim me Departamentin e Shërbimeve Sociale, ka ndërhyrë menjëherë për të garantuar sigurinë e fëmijëve, duke i dërguar në strehimore.

Ndërkohë, ministria ka kërkuar nga Inspektorati për Shërbimet Sociale dhe Familjare që të nisë urgjentisht një hetim institucional për mënyrën se si është trajtuar ky rast nga autoritetet lokale. Qëllimi i këtij hetimi është të verifikohet nëse janë respektuar të gjitha procedurat ligjore dhe nëse ka pasur mundësi për parandalimin e kësaj ngjarjeje.

Rasti mbetet nën hetim, ndërsa institucionet kanë theksuar se mbrojtja e fëmijëve është prioritet absolut dhe se do të ndërmerren të gjitha masat e nevojshme për zbardhjen e plotë të ngjarjes.