Në mëngjesin e së hënës, Gjakova u trondit nga një ngjarje e rëndë, ku një person humbi jetën dhe një tjetër mbeti i plagosur në rrethana dramatike.

I plagosuri, Edi Mehmeti, rreth 29 vjeç, po merr trajtim mjekësor dhe fatmirësisht ndodhet jashtë rrezikut për jetë.

Zëdhënësi i Policisë për rajonin e Gjakovës, Sheremet Elezaj, në një konferencë për media bëri me dije se autoritetet janë duke ndërmarrë të gjitha masat për lokalizimin dhe arrestimin e të dyshuarit, i cili aktualisht ndodhet në arrati.

Në vendin e ngjarjes janë gjetur disa gezhoja armësh dhe një armë e ftohtë, ndërsa hetimet janë në fazën fillestare, duke përfshirë mbledhjen e dëshmive nga të pranishmit. Elezaj theksoi se dorasi është i njohur për policinë, por nuk dha më shumë detaje mbi identitetin e tij.

Policia e Gjakovës apelon tek qytetarët për çdo informacion që mund të ndihmojë në kapjen e autorit, ndërsa hetimet vazhdojnë intensivisht.