Prokuroria Themelore në Prizren ka njoftuar se në bashkëpunim me Policia e Kosovës është zhvilluar një aksion më 2 prill 2026, ku është zbuluar një laborator droge për kultivimin e kanabisit në Prizren. Gjatë këtij operacioni janë arrestuar dy persona të dyshuar, ndërsa janë asgjësuar rreth 300 bimë të dyshuara si kanabis sativa të kultivuara në ambiente të mbyllura.
Sipas njoftimit zyrtar, të pandehurit M.M. dhe I.M. dyshohet se në bashkëkryerje kanë kultivuar pa autorizim bimë narkotike me qëllim prodhimin dhe përgatitjen e tyre për shitje në sasi të mëdha. Gjatë kontrollit në laborator janë sekuestruar mbi 700 vazo për kultivim, pajisje të avancuara për ndriçim, ngrohje dhe ventilim si motorë, trafo, klimë dhe termostatë, si dhe materiale të tjera ndihmëse si thasë me dhe dhe preparate për rritjen e bimëve.
Po ashtu, janë gjetur dhe konfiskuar gjethe dhe substanca të dyshuara narkotike me peshë mbi 90 gram, si dhe sasi më të vogla prej 1.19 gram marihuanë dhe 0.41 gram kokainë. Në vendngjarje janë sekuestruar edhe pajisje laboratorike shtesë, përfshirë pompë spërkatjeje dhe matës të lagështisë dhe temperaturës, si dhe një armë zjarri me 29 fishekë. Përveç kësaj, autoritetet kanë konfiskuar një veturë pa targa të markës Hyundai dhe një furgon, të cilët dyshohet se janë përdorur për transportin e narkotikëve dhe pajisjeve.
Prokuroria ka bërë të ditur se ndaj të dyshuarve rëndojnë veprat penale për kultivim të paautorizuar të bimëve narkotike, posedim dhe shpërndarje të narkotikëve, si dhe mbajtje të paautorizuar të armëve, sipas Kodit Penal të Republikës së Kosovës. Të njëjtit ndodhen në ndalim për 48 orë, ndërsa është paraqitur kërkesë për caktimin e masës së paraburgimit.
Autoritetet theksuan se do të vazhdojnë angazhimin në luftën kundër kriminalitetit dhe në forcimin e sundimit të ligjit, duke vënë para drejtësisë të gjithë ata që shkelin ligjin.
