Tensionet në Lindjen e Mesme janë rritur ndjeshëm pasi presidenti amerikan Donald Trump ka lëshuar një paralajmërim të ashpër ndaj Iranit, duke kërcënuar me pasoja të rënda në rast të sulmeve të reja.

Në një reagim publik, Trump deklaroi se nëse Irani sulmon sërish objektet e naftës dhe gazit në Katar, Shtetet e Bashkuara do të kundërpërgjigjen duke goditur një nga asetet më strategjike energjetike të Iranit – fushën gjigante të gazit South Pars Gas Field.

“Ne nuk duam përshkallëzim, por nëse Irani ndërmerr veprime të pamenduara, do të ketë pasoja shkatërruese,” u shpreh ai, duke shtuar se SHBA është e gatshme të veprojë me ose pa mbështetjen e aleatëve.

Deklarata e tij vjen pas sulmeve me raketa që goditën zonën industriale Ras Laffan Industrial City në Katar, ku ndodhet një nga impiantet më të mëdha në botë për përpunimin e gazit natyror të lëngshëm. Sipas autoriteteve, sulmet shkaktuan zjarre dhe dëme të konsiderueshme materiale, por fatmirësisht nuk pati viktima.

Nga ana tjetër, Doha zyrtare e ka cilësuar këtë sulm si një përshkallëzim të rrezikshëm të situatës dhe ka bërë të ditur se rezervon të drejtën për t’u përgjigjur për të mbrojtur sovranitetin e saj.

Situata u tensionua më tej pasi Izraeli kishte goditur më herët fushën e gazit South Pars, një veprim që besohet të ketë nxitur reagimin e Iranit ndaj objektivave në Katar.

Ndërkohë, komuniteti ndërkombëtar po ndjek me shqetësim zhvillimet e fundit, pasi çdo përshkallëzim i mëtejshëm mund të ketë pasoja të mëdha jo vetëm për rajonin, por edhe për tregjet globale të energjisë.