Qendra Kombëtare për Menaxhim Kufitar ka njoftuar se është rihapur për qarkullim të pjesshëm rruga në drejtim të Pejë, konkretisht në pikën kufitare Kullë-Rozhajë.

Sipas njoftimit, nga ora 13:00 kjo rrugë është e kalueshme vetëm për vetura të vogla, ndërsa për kamionët vazhdon të mbetet e bllokuar. Autoritetet kanë bërë thirrje që drejtuesit e mjeteve të pajisen patjetër me pajisje dimërore për shkak të kushteve të vështira në terren.

Bllokimi i rrugës erdhi si pasojë e reshjeve të dendura të borës që përfshinë zonën gjatë ditës së djeshme, duke e bërë qarkullimin të rrezikshëm dhe në disa raste të pamundur.

Situata u bë edhe më serioze kur disa persona mbetën të bllokuar në këtë segment, përfshirë një familje pesëanëtarëshe. Në ndihmë ndërhyri Shërbimi i Kërkim-Shpëtimit Malor, i cili realizoi evakuimin në kushte të vështira atmosferike.

Autoritetet kanë bërë të ditur se do të informojnë qytetarët për çdo ndryshim të mëtejshëm në gjendjen e rrugës.