Një peticion kombëtar në mbështetje të krerëve të Ushtrisë Çlirimtare të Kosovës që po gjykohen në Hagë ka mbledhur një numër të madh nënshkrimesh nga qytetarët. Përmes një platforme online, e cila është aktive tash e një muaj, qytetarët kanë pasur mundësinë të japin mbështetjen e tyre duke nënshkruar peticionin.
Sipas nënkryetarit të OVL-UÇK-së, Fatmir Sopi, deri më tani janë mbledhur rreth 100 mijë nënshkrime, ku rreth 28 mijë prej tyre janë realizuar online, ndërsa pjesa tjetër në formë fizike.
Sopi theksoi se hapat e mëtejshëm do të varen nga zhvillimet dhe vendimet që do të merren nga Gjykata Speciale, duke lënë të kuptohet se organizata do të reagojë në varësi të situatës.
Megjithatë, sipas avokatit Asdren Bytyqi, ky peticion nuk ka ndikim të drejtpërdrejtë ligjor në vendimmarrjen e trupit gjykues. Ai sqaroi se një nismë e tillë mund të ketë efekt simbolik dhe politik, duke reflektuar qëndrimin e një pjese të shoqërisë, por nuk mund të ndikojë në procesin juridik.
Bytyqi shtoi gjithashtu se gjatë procesit gjyqësor ka pasur, sipas tij, shkelje të të drejtave themelore të të pandehurve, përfshirë kufizime dhe presione në forma të ndryshme.
Dorëzimi i nënshkrimeve në Hagë pritet të bëhet në fillim të muajit maj, ndërsa mbetet për t’u parë ndikimi i kësaj nisme në aspektin politik dhe publik.
