Një nga aksionet më të bujshme kundër fajdes në Kosovë, i zhvilluar në mars dhe maj 2023 nga Prokuroria Themelore në Ferizaj, përfundoi me dënime që tashmë po ngrenë shumë pikëpyetje në opinionin publik.

Bastisje në disa qytete, arrestime, sekuestrime armësh, municionesh, narkotikësh dhe veturash luksoze – por në fund, shumica e të akuzuarve u dënuan vetëm me gjoba, pavarësisht se shumat e përmendura në aktakuzë kapin mbi 500 mijë euro.

Aktakuza dhe marrëveshja për pranim fajësie

Në dhjetor 2024, prokurori Rasim Maloku ngriti aktakuzë ndaj shtatë personave: Bashkim Mulolli, Albi Mulolli, Muharrem Kurda, Rrahman Sopjani, Shukri Haxhiu, Bali Krasniqi dhe Arlind Hasani.

Të akuzuarit hynë në marrëveshje për pranim fajësie, çka bëri që çështja të procedohej me procedurë të përshpejtuar. Më 28 mars 2025 u shpall aktgjykimi për pesë prej tyre, ndërsa për dy të tjerët procedura u veçua pasi ndodhen jashtë vendit.

Si funksiononte skema e fajdes?

Sipas aktakuzës, të pandehurit shfrytëzonin gjendjen e rëndë financiare të viktimave, duke u dhënë para me interesa marramendëse.

Një nga rastet më të rënda lidhet me G.Z., djali i pronarit të kompanisë “MCM City Center”. Ai kishte hyrë në një spirale borxhesh që, sipas dosjes, arriti deri në 435 mijë euro.

Në aktakuzë përmenden:

• Fajde mujore prej mijëra eurosh
• Marrje peng e veturave luksoze si “Mercedes S560” dhe “Mercedes GLA”
• Detyrim për të hyrë në lojëra fati për të mbuluar borxhet
• Kërcënime serioze me jetë

Në një rast, sipas dosjes, viktima ishte kërcënuar me fjalët:
“Po n’koft nevoja kam me t’vra… ndash shko në polici, ndash në prokurori.”

Dënimet e shqiptuara

Megjithëse u shpallën fajtorë për fajde, detyrim, organizim të bixhozit të paligjshëm, armëmbajtje pa leje dhe posedim narkotikësh, shumica përfunduan me gjoba.

• Albi Mulolli – 13 000 euro gjobë; konfiskim municionesh dhe 0.40 gram marihuanë.
• Muharrem Kurda – 7 000 euro gjobë dhe obligim kompensimi 6 200 euro.
• Rrahman Sopjani – 5 000 euro gjobë dhe 18 000 euro kompensim ndaj viktimës.
• Shukri Haxhiu – 15 500 euro gjobë dhe konfiskim përfitimesh pasurore.
• Bali Krasniqi – 8 muaj burgim efektiv dhe 12 500 euro gjobë; një pjesë e dënimit i është llogaritur nga paraburgimi dhe arresti shtëpiak.

Armë, fishekë dhe sasi të vogla narkotikësh janë konfiskuar në mënyrë të përhershme.

Dy të akuzuar jashtë vendit

Procedura ndaj Bashkim Mulollit dhe Arlind Hasanit është veçuar, pasi të njëjtit ndodhen jashtë Kosovës, pavarësisht marrëveshjes për pranim fajësie.

Çfarë përmbante dosja?

Aktakuza përshkruan:

• Hua me kthim joproporcional (11 mijë euro që shndërroheshin në borxhe 130 mijë euro)
• Fajde javore dhe mujore me norma ekstreme
• Detyrim për blerje dhe rishitje veturash me humbje të mëdha
• Borxhe të akumuluara deri në qindra mijëra euro

Në një rast, për 10 mijë euro të marra hua, viktima kishte paguar 26 mijë euro në total.

Debati që hap ky vendim

Rasti “Fajdeja” kishte nisur me aksione spektakolare dhe pritshmëri për dënime të ashpra ndaj fajdes në Kosovë. Por përfundimi me gjoba për shumicën e të akuzuarve ka hapur debat publik mbi proporcionalitetin e dënimeve.

A janë këto masa ndëshkuese në përputhje me përmasat e skemës dhe dëmin e pretenduar?