Një ngjarje tragjike ka tronditur futbollin në Gana, ku sulmuesi i Berekum Chelsea, Dominic Frimpong, ka humbur jetën pas një grabitjeje të armatosur.

Sipas raportimeve, sulmi ndodhi të dielën, ndërsa ekipi po kthehej nga një ndeshje e Premier League e Ganës në Samartex. Grabitës të armatosur hapën zjarr në drejtim të autobusit të skuadrës, duke shkaktuar panik dhe kaos.

Frimpong, vetëm 20 vjeç, u plagos rëndë në kokë gjatë sulmit dhe më pas ndërroi jetë në spital si pasojë e plagëve të marra.

Shoqata e Futbollit të Ganës reagoi me tronditje të thellë, duke e cilësuar ngjarjen si një humbje të madhe për futbollin në vend. Në reagimin zyrtar, federata i shprehu ngushëllime familjes së lojtarit, bashkëlojtarëve dhe gjithë klubit gjatë kësaj periudhe të rëndë.

Ngjarja ka tronditur jo vetëm komunitetin sportiv në Gana, por edhe më gjerë, duke rikthyer në vëmendje çështjet e sigurisë për ekipet sportive gjatë udhëtimeve.