Instituti Kombëtar i Shëndetësisë Publike të Kosovës ka njoftuar se gjatë periudhës 16–30 prill 2026 në Kosova janë konfirmuar tetë raste të Fruthi, ndërsa dy raste të tjera mbeten të dyshimta.

Sipas institutit, të gjitha rastet e konfirmuara janë fëmijë të pavaksinuar me vaksinën MMR (kundër fruthit, shytave dhe rubellës), të cilët aktualisht po trajtohen në spital.

Ky fakt, sipas IKSHPK-së, tregon rrezikun serioz të komplikimeve që mund të shkaktojë kjo sëmundje shumë ngjitëse.

Instituti ka bërë një thirrje urgjente për prindërit që të kontrollojnë kartelat e vaksinimit dhe të sigurohen që fëmijët e tyre janë të vaksinuar.

“Duke marrë parasysh natyrën shumë ngjitëse të fruthit dhe rrezikun për përhapje të mëtejshme, u bëjmë thirrje prindërve që të vaksinojnë fëmijët në qendrat më të afërta të mjekësisë familjare,” thuhet në njoftim.

Po ashtu, qytetarëve u rekomandohet të shmangin kontaktet me persona që shfaqin simptoma si temperaturë e lartë, skuqje në lëkurë, kollë apo rrufë, si dhe të paraqiten menjëherë në institucionet shëndetësore në rast dyshimi.

IKSHPK ka bërë të ditur se është duke monitoruar situatën epidemiologjike dhe ka ndërmarrë masa konkrete në terren, përfshirë identifikimin e fëmijëve të pavaksinuar dhe angazhimin e ekipeve mobile për vaksinim në komunitet.

Në fund, instituti rikujton se vaksinimi mbetet mënyra më efektive për parandalimin e fruthit dhe mbrojtjen e shëndetit publik.