Vjosa Osmani ka prezantuar Arjeta Musliu si pjesë të ekipit të saj politik, duke bërë të ditur se ajo do të kandidojë për deputete në zgjedhjet e ardhshme.

Përmes një postimi emocional, Osmani tregoi historinë personale të Musliut, e cila humbi djalin e saj si pasojë e varësisë nga substancat narkotike.

Sipas Osmanit, dhimbja personale e Arjetës është kthyer në një mision për të ndihmuar familjet që përballen me të njëjtin problem dhe për t’u dhënë shpresë të rinjve që luftojnë me varësinë.

“Historia e saj nuk u formësua nga politika, por nga dhimbja”, shkroi Osmani.

Ajo theksoi se Musliu nuk hyn në politikë për interes personal, por për të përfaqësuar zërin e familjeve që përballen me pasojat e substancave narkotike dhe për të ndihmuar në rikthimin e shpresës tek të rinjtë.

Osmani rikujtoi gjithashtu se në vitin 2021 e kishte dekoruar Arjeta Musliun me Urdhrin Presidencial “Shote Galica” për angazhimin dhe kontributin e saj.

“Ajo do të jetë zëri i kësaj kauze në Kuvendin e Kosovës”, u shpreh Osmani në fund të postimit të saj.