Bedri Hamza, kryetar i Partia Demokratike e Kosovës dhe kandidat për kryeministër, ka prezantuar sloganin zyrtar të fushatës së PDK-së për zgjedhjet e 7 qershorit: “Stop Krizës. Ndrysho Kosovën!”.

Përmes një videoje të publikuar në rrjetet sociale, ku shfaqen 16 persona të profesioneve dhe grupmoshave të ndryshme duke thënë fjalën “STOP”, Hamza tha se slogani përfaqëson më shumë sesa një mesazh politik.

Sipas tij, ky është një mision për t’i dhënë fund krizave që, sipas PDK-së, po rëndojnë jetën e qytetarëve të Kosova.

“STOP krizave politike. STOP çmimeve të larta. STOP pasigurisë, përçarjes dhe mungesës së shpresës”, thuhet në mesazhin e publikuar nga Hamza.

Ai theksoi se vendi ka nevojë për ndryshim, stabilitet institucional dhe një qeveri që fokusohet në mirëqenien e qytetarëve dhe familjeve kosovare.

Sipas Hamzës, kërkesa për ndryshim po vjen çdo ditë nga qytetarët në të gjitha anët e Kosovës, sidomos nga familjet, të rinjtë, punëtorët dhe pensionistët që po përballen me vështirësi ekonomike dhe sociale.

“Kur kjo kërkesë vjen nga qytetarët, atëherë ndryshimi nuk është vetëm nevojë – është domosdoshmëri”, u shpreh ai.

Në fund të videos, kandidati i PDK-së përcolli mesazhin: “T’i japim fund krizave. Ta ndryshojmë bashkë Kosovën!”.