Më 23 prill 2005 nisi një epokë e re në historinë e internetit, kur në YouTube u publikua videoja e parë ndonjëherë në këtë platformë.

Videoja, e cila zgjaste vetëm 18 sekonda, u postua nga njëri prej themeluesve të YouTube, Javed Karim, dhe titullohej “Me at the zoo” (“Unë në kopshtin zoologjik”).

Në klipin historik, Karim shihet duke qëndruar para elefantëve në San Diego Zoo, duke folur thjesht për feçkat e tyre.

Videoja ishte krejtësisht spontane, pa montazh profesional dhe pa skenar të përgatitur. Megjithatë, ato 18 sekonda të thjeshta shënuan fillimin e revolucionit të videove online.

Edhe pse në atë kohë nuk u bë virale, videoja tregoi se sa e lehtë mund të bëhej shpërndarja e përmbajtjeve video në internet — diçka që në vitin 2005 konsiderohej ende e pazakontë.

Me kalimin e viteve, YouTube u shndërrua në platformën më të madhe të videove në botë, me më shumë se dy miliardë përdorues aktivë.

Sot, videoja e parë historike ka kaluar mbi 388 milionë shikime, ndërsa kanali i Javed Karim numëron më shumë se gjashtë milionë abonentë.