Hekuran Murati, ministër në detyrë i Financave, Punës dhe Transfereve, ka njoftuar se nga sot ka nisur zyrtarisht procesi i aplikimit për mbështetjen e njëhershme financiare prej 100 eurosh për studentët.

Sipas njoftimit, aplikimi do të realizohet tërësisht në mënyrë digjitale përmes platformës shtetërore e-Kosova.

Murati ka shpjeguar se studentët duhet të kyçen në llogarinë e tyre në platformë, më pas të hyjnë te rubrika e shërbimeve dhe të përzgjedhin kategorinë “familja”.

Për aplikuesit janë vendosur dy formularë të ndryshëm:

• formulari për studentët që janë shtetas të Kosova;
• formulari për studentët që nuk kanë shtetësi të Kosovës, por që vijojnë rregullisht studimet në universitetet e vendit.

Ministri ka bërë të ditur se aplikimet do të pranohen vetëm për një periudhë të kufizuar kohore.

Afati i fundit për dorëzimin e kërkesave është data 5 qershor 2026.

Autoritetet u kanë bërë thirrje studentëve që të aplikojnë brenda afatit dhe të sigurohen që të dhënat e tyre në platformë të jenë të sakta.