Pas përfundimit të “Tubimit të Bashkimit”, kandidati për kryeministër nga Lidhja Demokratike e Kosovës, Lumir Abdixhiku, ka publikuar fotografi së bashku me ish-presidenten Vjosa Osmani, duke i bërë thirrje qytetarëve që t’i bashkohen rrugëtimit të tyre politik.

Në postimin e publikuar në rrjetet sociale, Abdixhiku tha se ky është fillimi i një rrugëtimi të ri për Kosovën dhe për qytetarët që besojnë në ndryshim.

“Qytetarëve të Kosovës, u shtrijmë ftesën për rrugëtimin që po nisë sot! Të ecim bashkë”, ka shkruar ai.

Tutje, Abdixhiku theksoi se Republika ndërtohet kur qytetarët marrin përgjegjësi për të ardhmen e vendit të tyre dhe nuk presin ndryshimin nga të tjerët.

“Sepse Republika bëhet kur zgjohet vetëdija e një populli që vendos të mos presë më askënd tjetër për ta bërë vendin e vet më të mirë. Ne jemi gati. Ejani dhe ju!”, thuhet në postim.

Publikimi vjen në kohën kur po intensifikohet bashkëpunimi politik mes Abdixhikut dhe Osmanit për zgjedhjet e 7 qershorit.