Monika Kryemadhi ka folur sërish për ndarjen nga ish-bashkëshorti i saj, Ilir Meta, duke zbuluar detaje të reja rreth krizës familjare që çoi në ndarje.

E ftuar në emisionin Kjo Javë në News24, ajo u shpreh se gjithçka nisi pasi Meta u largua nga banesa me pretendimin se ajo kishte kërcënuar familjarë dhe persona të lidhur me Tedi Blushi.

Sipas Kryemadhit, situata u përkeqësua më tej nga dyshimet dhe akuzat që pasuan, duke përfshirë pretendime për përgjim dhe bashkëpunim me SPAK. Ajo theksoi se këto zhvillime çuan në largimin e Metës nga shtëpia dhe në përkeqësimin e marrëdhënies së tyre.

Ajo deklaroi se hetimet dhe “dosja” në të cilën janë përfshirë ka qenë një nga arsyet kryesore që çoi në divorc, duke shtuar se pa këtë situatë ata mund të kishin vazhduar bashkë.

Ndër të tjera, Kryemadhi foli edhe për zhgënjimin personal pas një marrëdhënieje 30-vjeçare, duke theksuar se ndarja nuk lidhet me vendime politike, por me faktorë të brendshëm dhe ndërhyrje që, sipas saj, krijuan mosbesim mes tyre.

Deklaratat e saj kanë rikthyer në vëmendje një nga ndarjet më të komentuara në skenën politike shqiptare, duke nxitur reagime dhe diskutime të shumta në publik.