Finalja e madhe e Big Brother VIP Albania ka kurorëzuar Selin Bollati si fituese të edicionit të pestë, një sezon që ka mbajtur të mbërthyer publikun për muaj të tërë.

Balerina, e cila ishte ndër personazhet më të komentuara gjatë gjithë spektaklit, arriti të fitojë zemrat e teleshikuesve dhe të sigurojë çmimin e madh prej 100 mijë eurosh përmes votave të publikut.

Në momentin vendimtar, Selini u përball në pod me Armir Shahini, i njohur si Miri, i cili përfundoi në vendin e dytë pas një gare të fortë dhe plot emocione.

Fitorja e saj u prit me entuziazëm të madh nga fansat, ndërsa rrugëtimi i saj në shtëpi u karakterizua nga dinamika, performanca dhe momente që e bënë protagoniste deri në fund.

Një nga momentet më të komentuara të mbrëmjes ishte edhe prania e Dj Gimbo, i cili u shfaq pranë saj menjëherë pas shpalljes së fitueses. Dyshja u panë shumë të lumtur në krahët e njëri-tjetrit, duke shtuar edhe më shumë interesin e publikut për marrëdhënien e tyre.

Se si do të zhvillohet lidhja e tyre pas përfundimit të eksperiencës në BBVIP mbetet për t’u parë në vazhdim, por momenti i tyre në finale tashmë është kthyer në një nga më të komentuarit.