Ferat Shala ka njoftuar se Gjykata Themelore në Prishtinë ka aprovuar pjesërisht kërkesëpadinë e tij ndaj Avni Zogiani, lidhur me një publikim të bërë në rrjetin social Facebook.

Sipas vendimit gjyqësor, përmbajtja e publikuar është vlerësuar se ka shkaktuar dëm jo-material ndaj paditësit përmes shpifjes dhe se ka cenuar reputacionin e tij.

Gjykata ka konstatuar se publikimi në fjalë ka qenë i dëmshëm për imazhin dhe dinjitetin e Ferat Shalës, ndërsa kërkesëpadia është aprovuar pjesërisht. Vendimi është marrë më 21 maj 2026.

Pas vendimit, Shala ka deklaruar se aktgjykimi konfirmon pretendimet e tij dhe se rasti nuk lidhet me hakmarrje personale, por me mbrojtjen e së vërtetës dhe të reputacionit.

Sipas tij, askush nuk duhet të tolerojë sulme ndaj integritetit personal apo profesional përmes publikimeve të pavërteta në rrjetet sociale.

“Ky rast nuk ka të bëjë me hakmarrje personale, por me mbrojtjen e dinjitetit dhe të vërtetës”, është shprehur ai.

Vendimi i Gjykatës Themelore në Prishtinë mund të ankimohet sipas procedurave të parapara me ligj.