Ushtruesja e detyrës së presidentes së Kosova, Albulena Haxhiu, ka folur për çështjen e anëtarit të fundit të Komisioni Qendror i Zgjedhjeve, i cili ende nuk është emëruar.

Në një konferencë për media, ajo theksoi se aktualisht KQZ funksionon me 10 anëtarë nga gjithsej 11 sa parashihen, duke përfshirë edhe kryesuesin që vjen nga Gjykata Supreme e Kosovës.

Haxhiu deklaroi se mungesa e një anëtari nuk përbën problem për procesin zgjedhor dhe nuk ndikon në asnjë aspekt të tij.

“Me 10 anëtarë në Komisionin Qendror të Zgjedhjeve asgjë nuk rrezikohet: as certifikimi i partive, as certifikimi i rezultatit të zgjedhjeve dhe asgjë tjetër,” u shpreh ajo.

Ajo shtoi se ka pranuar kërkesa si nga Partia Demokratike e Kosovës ashtu edhe nga Lëvizja Vetëvendosje për emërimin e anëtarit të fundit, ndërsa çështja mbetet në shqyrtim.

Sipas saj, emërimi do të bëhet në momentin kur do të konsiderohet i përshtatshëm, duke respektuar parimet e përfaqësimit dhe proporcionalitetit politik.

Deklarata e Haxhiut vjen mes diskutimeve për ndikimin e kësaj mungese në proceset zgjedhore, ndërsa ajo siguroi se institucionet janë funksionale dhe nuk ka arsye për shqetësim.