Në Qendra Korrektuese për të Mitur në Lipjan është realizuar një projekt praktik që synon zhvillimin profesional të të miturve.

Sipas njoftimit zyrtar, aktiviteti përfshiu instalimin e gypave të rrjetit të ujësjellësit dhe montimin e një bojleri për furnizim me ujë të ngrohtë në objektin e administratës së qendrës.

Gjatë punës, të miturit aplikuan njohuritë e fituara duke instaluar sistemin sipas standardeve teknike dhe duke realizuar montimin e pajisjeve nën mbikëqyrjen e instruktorit.

Projekti u zhvillua në mënyrë të organizuar në grup, duke respektuar rregullat e sigurisë dhe duke përdorur teknikat e përvetësuara gjatë trajnimeve profesionale.

Sipas njoftimit, përmes këtij angazhimi ata kanë forcuar aftësitë teknike, bashkëpunimin dhe përgjegjësinë në punë.

Ky projekt konsiderohet një hap i rëndësishëm drejt përgatitjes së tyre për tregun e punës dhe integrimin në shoqëri, duke u dhënë mundësi të zhvillojnë aftësi konkrete për të ardhmen.