Një trajtim i ri kundër kancerit po konsiderohet si një nga zhvillimet më premtuese të viteve të fundit, pasi rezultatet e një prove klinike ndërkombëtare kanë treguar përmirësime të rëndësishme tek pacientët me forma të avancuara të sëmundjes.

Bëhet fjalë për ilaçin amivantamab, i zhvilluar nga Johnson & Johnson, i cili u testua në 11 shtete te pacientët me kancer të përhapur ose të rikthyer pas trajtimeve të mëparshme.

Sipas rezultateve të studimit, tumoret janë zvogëluar në më shumë se një të tretën e pacientëve të përfshirë në provë. Më mbresëlënës është fakti se tek 15 pacientë është raportuar zhdukja e plotë e tumorit vetëm disa javë pas fillimit të trajtimit.

Profesori Kevin Harrington nga Institute of Cancer Research e ka cilësuar këtë si një përparim të rëndësishëm për pacientët që kanë shumë pak alternativa trajtimi, duke theksuar se rezultatet janë jashtëzakonisht të forta për këtë kategori.

Studimi përfshiu gjithsej 102 pacientë me kancer të kokës dhe qafës, një nga format më të zakonshme të kancerit në nivel global. Nga këta:

• 43 pacientë shfaqën tkurrje ose zhdukje të tumorit;
• 28 pacientë patën zvogëlim të konsiderueshëm të tumorit;
• 15 pacientë nuk kishin më tumor të detektueshëm pas trajtimit.

Ekspertët kanë bërë të ditur se amivantamab ka treguar potencial edhe në disa forma të kancerit të mushkërive.

Ilaçi funksionon duke synuar proteinat që ndihmojnë rritjen e qelizave kancerogjene, duke bllokuar mekanizmat që i bëjnë ato rezistente ndaj trajtimeve dhe duke aktivizuar njëkohësisht sistemin imunitar të organizmit për të luftuar sëmundjen.

Sipas të dhënave të studimit, pacientët që morën trajtimin kanë jetuar mesatarisht 12.5 muaj pas fillimit të terapisë, pavarësisht prognozave të vështira me të cilat përballeshin.

Një nga pjesëmarrësit në studim, Carl Walsh, 56 vjeç, i diagnostikuar me kancer të gjuhës, ka deklaruar se ka vërejtur përmirësime të dukshme që nga fillimi i trajtimit.

Rezultatet e plota të studimit pritet të prezantohen në takimin vjetor të American Society of Clinical Oncology në Çikago, ndërsa studiuesit besojnë se ky trajtim mund të hapë një kapitull të ri në luftën kundër disa prej formave më agresive të kancerit.