FC Barcelona vazhdon të kërkojë përforcime në repartin ofensiv për sezonin e ardhshëm, me fokus të veçantë te lojtarët e Atletico Madrid.

Objektivi kryesor i katalanasve mbetet Julian Alvarez, por së fundmi është konfirmuar se në radarët e tyre ka hyrë edhe Alexander Sorloth, i cili shihet si një alternativë më e përballueshme financiarisht.

Sorloth ka qenë një kundërshtar i vështirë për Barcelonën në vitet e fundit, duke realizuar shtatë gola dhe tre asistime në 15 ndeshje kundër tyre, me fanellat e Real Sociedad, Villarreal CF dhe Atletico-s.

Megjithatë, një transferim i mundshëm duket i komplikuar. Atletico nuk është e gatshme të shesë lojtarin te një rival direkt dhe preferon ta mbajë në “Riyadh Air Metropolitano”, sidomos nëse skuadra do të kërkojë zëvendësues për Antoine Griezmann.

Në afatin e kaluar kalimtar, Sorloth u lidh edhe me Liverpool FC, ndërsa çmimi i tij vlerësohet rreth 35-40 milionë euro – një shifër që Barcelona e ka të vështirë ta paguajë për një lojtar që pritet të ketë rol dytësor.

Sa i përket Alvarezit, situata është edhe më e ndërlikuar, pasi Atletico nuk ka ndërmend të negociojë dhe nuk pranon ulje çmimi apo përfshirje lojtarësh në marrëveshje.

Në këtë fazë, duket se Barcelona do të fokusohet në objektiva të tjerë për sulmin, ndërsa interesimi për lojtarët e Atletico Madrid mbetet më shumë në nivel spekulimesh sesa një marrëveshje konkrete.