Konflikti mes aksionarëve të Aeroportit Ndërkombëtar të Vlorës ka hyrë në një fazë të re përplasjesh, duke bllokuar punimet në kantier dhe duke shtyrë pa afat nisjen e operimeve ajrore në jug të Shqipërisë.

Ministri i Infrastrukturës dhe Energjisë, Enea Karakaçi, ka deklaruar se qeveria nuk do të ndërhyjë në konfliktin mes ortakëve privatë, por do të zbatojë të gjitha klauzolat kontraktuale, përfshirë vendosjen e penaliteteve dhe deri në prishjen e njëanshme të koncesionit nëse situata nuk zgjidhet.

Sipas tij, bllokimi i punimeve nuk është më një çështje biznesi privat, por një problem që prek drejtpërdrejt interesin publik dhe reputacionin e shtetit shqiptar.

“Mosoperimi apo bllokimi i aeroportit nuk është thjesht çështje private, por çështje e interesit publik dhe shtetëror. Çdo vonesë do të trajtohet sipas kontratës, duke filluar nga penalitetet e deri te zgjidhja e njëanshme e marrëveshjes”, deklaroi Karakaçi.

Punimet të bllokuara prej 5 ditësh

Prej disa ditësh, kompania e lidhur me biznesmenin Behgjet Pacolli dhe nënkontraktorët e saj janë përjashtuar nga punimet në aeroport nga kompania koncesionare VIA, me pretendimin se nuk janë përmbushur afatet për përfundimin e terminalit.

Ky zhvillim ka sjellë një bllokim të plotë të kantierit dhe një dëm financiar të vlerësuar rreth 4 milionë euro. Ndërkohë, punonjësit e kompanisë së Pacollit kanë protestuar për disa ditë radhazi, duke kërkuar rikthimin në punë.

Pa afat për nisjen e fluturimeve

Ministri Karakaçi ka pranuar se aktualisht nuk ekziston asnjë datë për nisjen e fluturimeve nga Aeroporti i Vlorës, pasi ende nuk është përfunduar infrastruktura civile dhe nuk janë marrë certifikimet e nevojshme për operim.

“Nuk ka përfunduar infrastruktura dhe nuk ka certifikim. Për rrjedhojë, nuk ka ende operacionalitet”, tha ai.

Konflikt mes aksionarëve dhe hetime në vijim

Kriza në projekt lidhet me përplasjet mes aksionarëve të kompanisë “Vlora International Airport”, konkretisht mes kompanisë së Behgjet Pacollit dhe grupit të Valon Ademit, të cilët janë përfshirë në një betejë ligjore për strukturën e aksioneve dhe marrëveshjet e investimit.

Çështja është tashmë në gjykatë civile, ndërsa janë raportuar edhe hetime nga Prokuroria e Tiranës për dyshime mbi mashtrim dhe falsifikim dokumentesh ndaj palëve të përfshira.

Paralelisht, SPAK po heton edhe procedurat e dhënies me koncesion të projektit të aeroportit, përfshirë anëtarët e komisionit të vlerësimit të ofertave.

Dëm ekonomik dhe rrezik për reputacionin e vendit

Qeveria paralajmëron se çdo ditë vonesë në projekt sjell humbje të konsiderueshme ekonomike për turizmin, operatorët lokalë dhe buxhetin e shtetit.

Sipas ministrisë, mosfunksionimi i aeroportit në jug të vendit dëmton jo vetëm ekonominë, por edhe imazhin e Shqipërisë si destinacion investimesh dhe turizmi.